Taliyaha Ciidanka Xoogga dalka oo kormeeray fariisimo ay ciidamada Dowladda ku leeyihiin duleedka Kismaayo

Muqdisho(somalipm.com);- Taliyaha Ciidanka Xoogga dalka Sareeye Gaas Daahir Aadan Cilmi Indho Qarshe oo ku sugan magaalada Kismaayo ayaa maanta kormeeray Fariisimo ay leeyihiin Ciidanka Xoogga Dalka iyo Kuwa Dowlad Gobolleedka Jubbaland oo ku yaalo deegaanada Baarsanguuni,Buulagaduud iyo deegaanka Jammaame oo ka tirsan Jubbada Hoose.

Sareeye Gaas Daahir Aadan Cilmi Indho Qarshe ayaa ku dhiira geliyay Ciidamada Xoogga dalka iyo kuwa Maamulka Jubbaland iney sii laba jibaaraan dagaalka ka dhanka ah kooxda argagixisada Al-Shabaab,isagoona ku ammaanay siday ay u wiiqeen awooda maleeshiyada Al-Shabaab.

“ Aad iyo aad waxaan idin kugu dhiira gelineynaa inaad iska dhicisaan nimankaasi,anaguna waxaan balan qaaddeynaa inaan idin ku taakuleyno sidii la isaga dhicin lahaa ama aqoon ha noqoto ama qalab ama wax walba oo aad Dowladda uga baahan tihiin,idinkana waajibaadkiina sidaasi oo kale baan idin ka rabnaa inaad u gudataan,aad baad u mahadsan tihiin waxaan isku ognahay guul iyo gobanimo,” ayuu yiri Sareeye Gaas Daahir Aadan Cilmi Indho Qarshe.

Taliyaha Ciidamada Xoogga dalka ayaa ka dalbaday Saraakiisha Ciidamada Xoogga dalka ee ku sugan Jubbaland iney soo diraan ragga ugu wanaagsan ee ugu geesinimada badan Ciidanka Xoogga dalka iyo kuwa Jubbaland si tababar heerkiisu sareeyo loogu siiyo Xerada tababarka Turk-som ee magaalada Muqdisho.

Sareeye Gaas Daahir Aadan Cilmi Indho Qarshe ayaa kormeeray fariisimo ay Ciidamada Xoogga dalka iyo kuwa Jubbaland kaga sugan yihiin deegaanka Baarsanguuni iyo Buulagaduud oo ka tirsan Gobolka Jubbada hoose,wuxuuna ciidamada kula dardaarmay iney laba jibaaraan dagaalka ay kula jiraan kooxaha argixisada.

Ugu danbeyntii,Taliyaha Ciidamada Xoogga dalka sareeye Gaas Indho Qarshe ayaa sheegay in Dowladda Federaalka Soomaaliya ay qorsheyneyso in sanadkan Maleeshiyada Al-Shabaab laga xoreeyo dalka oo dhan la iskuna furo waddooyinka muhiimka ah ee Gobollada dalka sida waddooyinka isku xira Muqdisho iyo Kismaayo,Muqdisho iyo Baydhabo iyo waliba in la furo wadada isku xirta magaalooyinka Muqdisho iyo Baladweyne.


Source: somalipm.com

LEAVE A REPLY

Please enter your comment!
Please enter your name here